النرجسية الصحية.. أن تُحب نفسك بلا ذنب
كتبت: هبه حمدي مطاوع
كلمة “نرجسية” إرتبطت في أذهاننا بالأنانية وحب الذات المَرَضي، لكن علم النفس بيقول إن فيه نوع تاني مختلف تمامًا: النرجسية الصحية. هي مش إنك تشوف نفسك فوق الناس، ولا إنك تلغي اللي حواليك، لكنها إنك تتصالح مع ذاتك، وتديها حقها من التقدير والاحترام.
إحنا اتربّينا على فكرة إن التضحية دايمًا فضيلة، وإن اللي يفكر في نفسه يبقى مقصّر.
ومع الوقت بنلاقي روحنا بنجري نرضي الكل، إلا الشخص الوحيد اللي عايش جوانا. لحد ما ييجي يوم نسأل: طب وأنا؟
النرجسية الصحية بتقول لك: من حقك تقول “لأ” من غير ما تحس بالذنب، ومن حقك تختار راحتك قبل ما تختار إرضاء الآخرين، ومن حقك تحب شكلك وصوتك وطريقتك حتى لو مش شبه حد.
الإنسان اللي عنده قدر صحي من حب الذات بيبقى أحنّ على غيره، لأن اللي متصالح مع نفسه بيعرف يحتوي، أما اللي بيجلد ذاته طول الوقت، فغالبًا هيجلد اللي حواليه من غير ما يقصد. مش مطلوب تبقي مثالي، ولا قوي على طول الخط، المطلوب بس إنك تبص لنفسك بعين رحيمة، وتفتكر إن روحك ليها حق عليك زي ما للناس حقوق
يمكن أعظم درس بنتعلمه في الرحلة دي إننا مش مضطرين نكون نسخة ترضي الجميع. كفاية نكون النسخة اللي مرتاحة من جوّه.
وحب النفس مش رفاهية، ده خط الدفاع الأول ضد الإحباط والوحدة والاستنزاف.
النرجسية الصحية هي إنك تقول لنفسك كل صباح: أنا أستحق فرصة جديدة، أستحق راحة، وأستحق محبة غير مشروطة.. أولها منّي.
وفي زمن مليء بالصخب والمقارنات، يمكن أجمل هدية نقدّمها لروحنا هي شوية حنان شخصي، وهدنة صغيرة مع قلوبنا، لأن اللي يعرف يحب نفسه صح، يعرف يحب الحياة كلها بشكل أجمل.
