الله يرحمك يا صلاح يا جاهين
بقلم: طارق ناجح
الله يرحمك يا صلاح يا جاهين
شعرك وحُبَّكْ جوَّه القلوب باقيين
ده أنت اللي علمتنا معنى الحياة
علمتنا إن إحنا مستضعفين
الله يرحمك يا صلاح يا جاهين
★★★★★★★★
الله يرحمك يا أستاذ الأساتيذ
وشوشنا شابَّة لكن القلوب عواجيز
الدنيا قاسية والحياة براويز
وإحنا بروازنا الآسى والأنين
الله يرحمك يا صلاح يا جاهين
★★★★★★★★★★
قلبك الطيب إيه أجهده
نكسة …هزيمة .. ولَّا شجن
دنيا مآسي كلها دنيا مِحَن
زمن غرور جسور ما أجحده
زمن اللصوص و المرتشين
الله يرحمك يا صلاح يا جاهين
