خاطرة اليوم
تتغير الحياة بين حرفين
بقلم: دكتور سعد شمس الدين
ممكن يكون الفرق بين الألم والأمل حرف واحد لكن في الحقيقة الفرق بينهم حياة كاملة، وكمان المحنة والمنحة بينهم حرف بسيط لكن بينهم رحلة كبيرة من الصبر والدعاء والثقة في ربنا سبحانه وتعالى
لننتبه جيدا فأحيانا فيه لحظات بنفتكر إن الدنيا ضاقت وإن اللي بنمر بيه مجرد وجع وخسارة وبعد فترة نكتشف إن نفس الوجع هو اللي علمنا وقوا قلوبنا وغيرنا للأفضل
لنكن علي يقين أن الألم مش آخر الحكاية بالعكس ده أوقات بيكون أول طريق الأمل، والمحنة مش دائما عقاب ساعات بتكون منحة متخفية ربنا بيجهز بيها قلوبنا لخير أكبر مما كنا نتخيل
علشان كده نصيحتي النهارده اوعى تحكم على يومك من وجعه وألمه ولا على حياتك من موقف صعب واصبر وخد بالأسباب وسيب الباقي على ربنا
يمكن النهارده تتألم لكن بكرة هتشكر ربنا إنك مريت بالتجربة دي لأنها صنعت منك إنسان أقوى وواعي وأقرب إلى الله سبحانه وتعالى
وافتكر دائما أن وراء كل ألم أمل وداخل كل محنة منحة لكن لا يراهما إلا من أحسن الظن بالله وصبر حتى النهاية
وأخيرا لخص المولي سبحانه وتعالى الأمر بقوله ” وعسي أن تكرهوا شيئا وهو خير لكم وعسي أن تحبوا شيئا وهو شر لكم والله يعلم وأنتم لا تعلمون”
تتغير الحياة بين حرفين
